- تعليق : “طلع مزدوج الجنسية تحيا الثورة”.. وآخر : برضو بنحبه وعاوزينه
- معلق : “إبن رئيس الوزراء بيتسرق يبقي المواطن يعمل ايه؟”.. وآخر: إيه الرسالة بالضبط
- عاوزين تقولوا إن إبنه معاه جنسية أمريكية؟ وإيه يعنى؟ برضه عاوزينه وبنحبه وأحسن من المجرمين إللى كانوا ماسكين البلد؟
- مواطن: “لو تعرف أمين شرطة في القسم ممكن يساعدك”.. وتعليق :”إدي المخبر 20 جنية هيجبهولك”
- “قولوا له يسمى و يدور هنا ولا هنا”.. “دورتوا بين السرير والحيطه أو ف أدراج النيش”
- وتعليق يحسم : يا جماعه ده إنسان واضح وصريح ومعندوش حاجه يخاف منها بدليل انه نزل ابنه يعمل محضر
كتب – أشرف جهاد :
أثار الخبر الذي نشرته العديد من المواقع حول قيام المهندس كريم، نجل الدكتور عصام شرف، رئيس مجلس الوزراء، بتحرير محضر في قسم شرطة الدقي باختفاء جوازي سفره المصري والأمريكي من داخل منزله. العديد من ردود الفعل ما بين مكذب ومدافع
و أشار الخبر إلى أن نجل رئيس الوزراء لم يتهم أحداً بسرقتهما، وطلب فقط إثبات الحالة.
وتباينت ردود الأفعال إزاء الخبر, فقد أبدى البعض تشككهم في السبب وراء تسريب الخبر وعلقوا قائلين:
-هتلاقيه هنا ولا هنا.. مش معقول يعني يحصل ده, إيه الرسالة بالظبط؟
- الخبر عاوز يعرفنا أن رئيس الوزراء بتاعنا شخص عادي زي لما بلعنا الطُعم بتاع محل الفول
وتساءل أحدهم.. ما هو الهدف من نشر هذا الخبر؟ برده بنحبك يا عصام يا شرف يا أبو الشرف
واعتبر عدد من النشطاء على تويتر والمعلقين على المواقع الإخبارية الإلكترونية أن الغرض يهدف إلى التشكيك في رئيس الوزراء عبر التركيز على ازدواج جنسية نجله..
-السبب فى الخبر ده مش سرقه الجوازات ولكن المقصود إنهم يعرفوا الناس إن ابن الدكتور عصام معه جواز سفر امريكى وانتم عارفين الباقي.
- عاوزين تقولوا إن ابنه معاه جنسية أمريكية؟ وإيه يعنى؟ برضه عاوزينه وبنحبه وأحسن من المجرمين اللي كانوا ماسكين البلد؟ .
وتوقع معلقون على تويتر أن يستخدم البعض هذا الخبر في الهجوم والتشكيك في الثورة وكتب أحدهم:” هتلاقي دلوقتي بتوع الثور المضاده بيعلقوا علي جواز السفر الامريكي” وآخر:” عايزين يعرفونا ان ابن رئيس الوزراء معاه جنسية امريكية وتبدا الاتهامات بانه عميل ويطلع واحد يقول انا مش قلتلكم انه ثورة ليها اجندات خارجية وانه ايام مبارك متتعوضش ياريت محدش يسخن فى الكلام “..
والغريب أن ما توقعه صاحب التعليق حدث و بدأ سيل هجوم من بعد المعلقين على شرف والثورة:
-هو رئيس الوزراء ابنة امريكانى المفروض يا حلو تكون بره إحنا مش قولنا مصري ومتجوز مصرية
-يا ترى بقى د .عصام برضة عنده جنسية هو كمان ولا مقدم على جرين كارت بس.. نطالب بمسئولين مصريين بس بدون جنسية أخرى.
-الفضيحة والكارثة مش فى سرقه ابن رئيس الوزراء الفضيحة فى انه يحمل الجنسية الأمريكية
-جواز سفر أمريكي وآخر مصري .. ابن رئيس وزراء ميدان التحرير
مزدوج الجنسية.. هو الشعب مبقاش فيه حد مصري
-معناه انه طلع مزدوج الجنسية وتحيا الثورة
ودافع عدد من المعلقين والنشطاء على الفيس بوك عن شرف قائلين:
- لمن لا يعرف الإنسان عصام شرف .. وكريم عصام شرف… المهندس كريم ..يعيش بشقته المستقلة مع أسرته الصغيرة.. وأما عن امتلاكه لجواز سفر أمريكي … فهذا يرجع إلى أنه قد تمت ولادته ((كريم )) فى الولايات المتحدة أثناء حصول الدكتور عصام على إحدى شهادات الدكتوراه.
- ألا يعلم القاصي والداني أن أي شخص يولد فى الولايات المتحدة يمنح الجنسية الأمريكية؟
ووجد بعض المعلقين في الخبر دليلا على تدهور الوضع الأمني, منتقدين ما وصفوه بتقصير الشرطة: -إذا كان ابن رئيس الوزراء بيتسرق يبقي المواطن العادي يعمل إيه؟
-وربنا خبر زي الفل بيفكرني بالمثل الشهير باب النجار مخلع دا بقا اليومين دول ما فيش باب أساسا
-يا ليلة مهببة بطين بيت رئيس الوزراء بيتسرق يا ناس . عيب أوى عليك يا داخلية عيب عليكم يا رجالة شرطتنا
-نسأل الفلول… شيء خطير ان يخترق منزل د.شرف بهذة السهولة
-لو تعرف أمين شرطة في القسم ممكن يساعدك
-لو تعرف اى حد فى القسم … ممكن يحلهالك .. انا بيتهيألى .. تروح لرئيس الوزراء على طول .. بيقولو راجل طيب اوى .. !!
-يا باشا ادي المخبر 20 جنية هيجبهولك في ساعتين ايه المشكلة خلينا نركز في الاهم , الاهلي هيكسب الاتحاد ويقرب من القمة ولا ايه حد يرد عليا ويطمني .
كما تناول البعض الموضوع بسخرية وطالبوا نجل رئيس الوزراء بالبحث جيدا عن ضالته..
- قولوا له يسمى و يدور هنا ولا هنا.
-غريبة فعلا ؟؟؟ طب دورتوا بين السرير والحيطه أو ف أدراج النيش معلش ربنا يقرب البعيد.
-الخبر غريب و ظريف فى نفس الوقت ، و أحترم جدا تصرف أبنة بعمل محضر زية زى أي مواطن عادى
وحسم أحد المعلقين القضية قائلا ” يا جماعه ده إنسان واضح وصريح ومعندوش حاجه يخاف منها بدليل انه نزل ابنه يعمل محضر والإجراءات تمشى طبيعي وإنشاء الله تكون الجوازات فى جيب البنطلون وناسي
ليست هناك تعليقات:
إرسال تعليق
لادراج تعليق :-
اختر " الاسم/عنوان url " من امام خانة التعليق بأسم ثم اكتب اسمك ثم استمرار ثم التعليق وسيتم نشرة مباشرة