9632; الدكتور خالد منتصر من الكتّاب الذين أعشق كتاباتهم وأواظب على قراءتها.. ذلك لأن الرجل يتميز بتستيفة علمية للدماغ.. كانوا زمان يقولولنا كده.. اللى يدخل علمى دماغه تتستف أحسن.. لأنه بيتدرب على التحليل العلمى للأشياء.. وبيحترم المقدمات التى تؤدى إلى نتائج.. ينحاز للمنطق العلمى.. يعطى للمخ حقه ويضرب تعظيم سلام للاختراع الذى يساهم فى تطور البشرية.. يمكن كانوا بيقولولنا كده عشان العيال بتوع أدبى ماكانوش بياخدوا دروس خصوصية غير فى اللغات والمدرسين مفروسين منهم.
9632; وبما إنى من عشاقه، فقد قرأت له مقالا بعنوان: الدليل الشرعى يقهر الـ«دى. إن. إيه».. حكى فيه حكاية الرجل اللى رفع قضية إسقاط نسب عندما تبين له أن بنته مش بنته وتأكد من ذلك عن طريق الـ«دى. إن. إيه»، ولكن المحكمة أجابت طلبه بالرفض، مغلبة الدليل الشرعى على الدليل العلمى.. ثم قرأت له مقالا ثانيا يعلق فيه على فتح برنامج «مصر النهارده» لهذا الملف واستضافة بعض الضيوف العارفين فى هذه المسألة.
9632; شاهدت الحلقة التى لم أخرج منها بأى خلاصة بالمرة.. وبدا الأمر وكأن موضوع الـ«دى. إن. إيه» هذا جديد ومستحدث ولم يسبق الحديث فيه، رغم أن أحد الضيوف وهو رئيس مصلحة الطب الشرعى السابق صرح بأنه أول من أدخل هذا التحليل على المصلحة منذ عام 1995.. ورغم تصريح ضيف آخر وهو محام متخصص فى قضايا الأسرة بأن التشريع به قصور شديد فى معالجة هذه الأمور، وأن القانون المعمول به صادر منذ عام 1920 واعتراض ممثل مجمع البحوث الإسلامية على ذلك مبينا الطرق التى حددت بها الشريعة الإسلامية إثبات النسب.
9632; جعلتنى هذه الحلقة أعود بالذاكرة إلى الوراء عندما كنت أقدم برامج التوك شو، واستعرضت فيها شتى المواضيع التى مازالت تجرى على الساحة الآن.. وكأن الزمن لم يمر ولم يحدث هذا من خمسة عشر عاما.
9632; أيامها كنت أشاهد بكثافة شديدة جدا ومازلت قدر المستطاع كل برامج التوك شو الناجحة فى الخارج.. بدءا بأوبرا وينفرى وانتهاء بجيرى سبرنجر.. يعنى من قمة الفائدة والعقلانية إلى مستنقع الرخامة والرذالة والبذاءة.
9632; وكانت تلك البرامج تناقش طبعا موضوع الـ«دى. إن. إيه» الذى كان جديدا وقتها ولكن كانت نتائجه قد أثبتت وبدأ العمل به فى حل قضايا كثيرة ومتنوعة.. حتى إن بعض مقدمى هذه البرامج تخصص فى هذا الموضوع بالذات، وأصبحت الحالات التى يناقشها هى عبارة عن معامل متخصصة ومعتمدة تقوم بإجراء التحليل لكل من ضاقت سبله أو ذات يده وأراد أن يصل إلى حل ينصف جميع الأطراف.
9632; كان الناس يتقدمون إلى هذا البرنامج طالبين مساعدتهم فى التعرف على الأب الحقيقى للأطفال.. رغم أن التبنى هناك مباح وليس على المتبنى أو الطفل المتبنى أى حرج.. ولكن فى ظل الهوجة الجنسية وحرية ممارستها، بدأت العرقيات المختلفة تفيق إلى حقيقة اختلاط الأنساب وحالة السلبطة وتلقيح الجتت التى ترتكبها بعض النساء فى حق الرجال، والتى كانت تنتهى دائما برجالة بيتلزقلهم عيال مش بتوعهم.. أو بتخلى أبهات عن عيال بتوعهم وتدبيس أبهات تانيين.
9632; كانت هذه البرامج توضح الحقائق فى ساعات.. وتوفر على الناس مشقة رفع القضايا وشغل حاورينى يا طيطة ولعب المحامين الذى يتم فيها، خصوصا فى قضايا إسقاط النسب.. كانوا يقولون إن ما يمكن الشك فيه بنسبة واحد فى المليون، وهو الإثبات، فإنه يؤكد تماما فى حالة نفى النسب.
9632; الخلاصة التى خرجت بها من هذا البرنامج هى، ولا حاجة.. أو يبقى الوضع على ما هو عليه عشرين تلاتين سنة جايين.. ونفضل نلف فى الساقية متغمية عينينا والعالم بيجرى من حوالينا.
9632; ولكن استنتجت أن ما هو مشكوك فيه وهو نتائج إثبات النسب معمول به.. يعنى التحليل اللى فيه شك واحد فى المليون من جهة الإثبات هو الذى تأخذ به المحاكم، تحقيقا لمبدأ حماية الطفل.. أما التحليل المؤكد غير المشكوك فيه، وهو نفى النسب، فهذا لا يعمل به.. تحقيقا لمبدأ غريب وهو حماية الطفل برضه.. يعنى راجل يعرف إن الواد مش ابنه ويعمل بدل التحليل اتنين وتلاتة يفرض عليه الولد حماية له.
9632; طيب ليه مش بنفكر فى الراجل اللى اتفرض عليه العيل اللى مش بتاعه.. كيف سيعامله حتى لو كان أحن البشر، كيف سيعامل الأم اللى لعبت بديلها.. مين اللى قال إن الولد حايفضل عبيط وأهبل ومش حايعرف الحقيقة دى فيما بعد.. ما هو إحنا مش بنتكلم عن بلد عشان تروح للبلد اللى جنبها، لازم تركب الجمل تلات شهور..
دا إنت بتدوس زرار تبقى هناك.. وبنتكلم عن عيال قاعدة عالنت اربعة وعشرين ساعة.. مين اللى قال إن الولد نفسه مش حايسعى لعمل الـ«دى. إن. إيه» فى المستقبل ليتحقق بنفسه لأنه يمكن الراجل اللى يلبسه يكون فقير أو حاله معووج بينما الأب الحقيقى يكون غنى والنسب إليه يشرّف.... مين اللى مُصِرّ يتجاهل وجود الأب التانى.. ما هو مش عفريت مالوش وجود.. ده موجود وفيه دليل على وجوده هو الأم.. اللى عارفة مين الأب الحقيقى..
مين اللى قال إننا لازم نساعد الأم على التستر على هذا الشخص.. مش دى فى حد ذاتها جريمة.. أو يمكن حرمانه من أبوته درءا لفضيحتها.. مين اللى يتحمل مسؤولية اختلاط الأنساب.. وفرض مبدأ التبنى على أب يعلم الحقيقة.. مين ياخد وزره.. كيف نفرض على الأب أن يوزع ثروته على أولاده ويقاسمهم فيها من ليس منه.. مش ده ظلم للأب وللأولاد التانيين الحقيقيين اللى ممكن ما يكونوش من نفس الأم المخطئة.. مين اللى قال إن الزيجة نفسها ستستمر.. الراجل يلبس العيل لكن مش مضطر يكمل مع نفس الزوجة.. وده أقرب جدا للواقع.. بالمنطق يعنى.
9632; مين اللى مفترض إن العمل بالـ«دى. إن. إيه» سيقوض المجتمع؟؟.. بالعكس.. عندما تتواجد وسيلة علمية مؤكدة يمكن الوصول إلى الحقيقة عن طريقها فى ساعات، ستنقرض هذه القضايا.. وسيلتزم الجميع.. ويخف الضغط عالمحاكم.
9632; أسئلة كثيرة جدا أتمنى أن يجاوب عليها المسؤولون.. هذا علم فرض نفسه ويجب الاعتراف به والاستعانة به فى تحقيق العدالة بتاعة 2010.. إحنا عايشين فى العالم.. مش فى كوكب لوحدنا.
المصري اليوم
ليست هناك تعليقات:
إرسال تعليق
لادراج تعليق :-
اختر " الاسم/عنوان url " من امام خانة التعليق بأسم ثم اكتب اسمك ثم استمرار ثم التعليق وسيتم نشرة مباشرة