بقلم / عوض بسيط
1- التعديلات معظمها لطيف وظريف اه، بس في بلاوي تانية ف الدستور خاصة بتاعة صلاحيات الرئيس ماجاتش جنبها
2- أنا معترض على شروط اختيار رئيس الجمهورية وشايف انها غير دستورية. هتقولي مش عايزين واحد مراته اسرائيلية يبأى رئيس جمهورية، هقولك سيبه يرشح نفسه وشوف اللي هيجراله
3- سيبك من اللي فات خد اللي جاي ده المهم
4- حسب خطة المجلس العسكري قالك نعمل استفتا وبعديه في يونيو انتخابات البرلمان وبعدين ف أغسطس الرئاسة.. جميل ويبأى عندنا رئيس بجد زي أوربا هيييييييييه.. بس استنى دي كارثة.. أقولك ليه..
أ. المادة 189 مكرر بتقول ايه: يجتمع الأعضاء غير المعينين لأول مجلسي شعب و شورى تاليين لإعلان نتيجة الاستفتاء على تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة اشهر من انتخابهم و ذلك كله وفقا لأحكام الفقرة الأخيرة من المادة 189.
يعني المجلس اللي هننتخبه بعد شهرين هيكون عنده صلاحيات يختار لجنة تأسيسية تحط دستور جديد لانج.. وطبقًا لنص المادة ماحددش من بره المجلس ولا من جوه المجلس.. طب إبه المشكلة؟
ب- المشكلة إن انتخابات بعد شهرين مفيش تنظيمات سياسية مستعده ليها إلا الأخوان والحزب الوطني (دول زي ديل البرص لسه بيلعب) وده معناه ان الأغلبية هتكون أخوانية، يبقى يجيبوا اللي على مزاجهم يعمل دستور.
ج- متوقع في الدستور الجديد تتحول مصر لجمهورية برلمانية؛ يعني الرئيس يبقى شرفي زي ملكة بريطانيا كده، ورئيس الوزرا هو اللي يدير البلد.
ج- يعني إيه دولة برلمانية؟ يعني حزب الأغلبية هو اللي يشكل الحكومة، ومين الأقرب للأغلبية دلوقت؟ طبعًا الأخوان..
د- يبقى لما نقول آه للتعديلات، معناه ان سيناريو الانتخابات يمشي بنفس السرعة وبكده بنساعد الأخوان يوصلوا للسلطة
هـ- طب لو قلنا اه وطالبنا بانتخابات الرئاسة قبل البرلمان؟ يبقى كده بنجيب إله مش رئيس، عنده كل لاصلاحيات ومفيش برلمان.
علشان كده أنا هقول لأ للتعديلات الدستورية
وبعد كده نواصل الضغط من أجل مجلس رئاسي مدني يدير البلد مدة سنة على الأقل، علشان يبقى عندنا حياة سياسية حقيقية ممكن تمثل كل التيارات
شارك انت كمان برأيك
بارك الله فيك
ردحذف